ఇక్కడ నెక్సాన్, అక్కడ ఓస్ప్రే... దక్షిణాఫ్రికాలో దూసుకుపోనున్న టాటా కారు!

ప్రముఖ భారతీయ ఆటోమొబైల్ దిగ్గజం టాటా మోటార్స్, దక్షిణాఫ్రికా మార్కెట్లో తన కార్యకలాపాలను ముమ్మరం చేస్తోంది. భారత్‌లో అత్యంత ప్రజాదరణ పొందిన కాంపాక్ట్ ఎస్‌యూవీ 'నెక్సాన్'ను అక్కడ 'టాటా ఓస్ప్రే' అనే కొత్త పేరుతో విడుదల చేయనున్నట్లు సంస్థ అధికారికంగా ప్రకటించింది. 2026 మూడవ త్రైమాసికంలో ఈ నూతన ఎస్‌యూవీ మార్కెట్లోకి ప్రవేశించనుంది.

దక్షిణాఫ్రికాలో ఇప్పటికే అందుబాటులో ఉన్న పంచ్, కర్వ్ మోడళ్ల మధ్య ఈ ఓస్ప్రేను నిలపాలని టాటా మోటార్స్ యోచిస్తోంది. దాదాపు ఆరేళ్ల విరామం అనంతరం 2025లో దక్షిణాఫ్రికా ప్యాసింజర్ వాహన విభాగంలోకి కంపెనీ పునఃప్రవేశం చేసింది. ప్రస్తుతం అక్కడ టియాగో, పంచ్, కర్వ్, హ్యారియర్ మోడళ్లను విక్రయిస్తోండగా, ఇప్పుడు ఓస్ప్రే రాకతో మార్కెట్లో తన పట్టును మరింత పటిష్ఠం చేసుకోవాలని లక్ష్యంగా పెట్టుకుంది.

భారత్‌లో టాటా నెక్సాన్ విక్రయాల్లో సరికొత్త రికార్డులను సృష్టించింది. ప్రపంచవ్యాప్తంగా ఇప్పటివరకు 10 లక్షలకు పైగా యూనిట్లు అమ్ముడవ్వగా, 2026 జూన్ లో దేశంలో అత్యధికంగా అమ్ముడైన కార్ల జాబితాలో ఇది రెండో స్థానంలో నిలిచింది. దక్షిణాఫ్రికా మార్కెట్ కోసం 'ఓస్ప్రే'గా నామకరణం చేసినప్పటికీ, ఇది భారతీయ నెక్సాన్ మోడలేనని కంపెనీ స్పష్టం చేసింది. గ్లోబల్ ఎన్‌‍సీఏపీ, భారత్ ఎన్‌‍సీఏపీ పరీక్షల్లో 5-స్టార్ సేఫ్టీ రేటింగ్స్‌తో పాటు అత్యాధునిక టెక్నాలజీ, ప్రీమియం ఇంటీరియర్స్‌తో ఈ కారు లభించనుంది.

ఈ ఎస్‌యూవీ విడుదల తమ బ్రాండ్‌ ప్రస్థానంలో మరో కీలక మైలురాయి అని టాటా మోటార్స్ సౌత్ ఆఫ్రికా మార్కెటింగ్ జీఎం జెఫ్ అల్లిసన్ పేర్కొన్నారు. వాహన ఇంజిన్ సామర్థ్యం, ధరల వివరాలను త్వరలోనే వెల్లడిస్తామని ఆయన తెలిపారు. మార్కెట్ వర్గాల అంచనాల ప్రకారం, దీని ప్రారంభ ధర సుమారు 3,40,000 దక్షిణాఫ్రికా రాండ్‌లుగా ఉండే అవకాశం ఉంది. ఓస్ప్రే అనంతరం, ఇదే ఏడాది చివరిలో సియెర్రా ఎస్‌యూవీని కూడా లాంచ్ చేసేందుకు టాటా మోటార్స్ సన్నాహాలు చేస్తోంది.